Сыбайлас жемқорлық – мемлекет дамуына кері әсерін тигізетін қауіпті әлеуметтік мәселе. Ол қоғамдағы әділдік пен сенімді әлсіретіп, елдің экономикалық және рухани дамуына кедергі келтіреді. Сондықтан сыбайлас жемқорлықтың алдын алу – мемлекет үшін де, қоғам үшін де маңызды міндеттердің бірі.

Қазіргі таңда елімізде сыбайлас жемқорлықпен күреске ерекше көңіл бөлінуде. Мемлекеттік қызмет көрсету сапасын арттыру, ашықтықты қамтамасыз ету және заң үстемдігін нығайту бағытында түрлі шаралар жүзеге асырылып келеді. Бұл жұмыстар халықтың мемлекетке деген сенімін арттыруға бағытталған.

Сыбайлас жемқорлықтың алдын алудың басты жолы – адалдық пен әділдік қағидаларын қоғамда кеңінен қалыптастыру. Әрбір азамат заң талаптарын сақтап, пара беру мен пара алудың құқық бұзушылық екенін түсінуі қажет.

Мемлекеттік қызметшілер үшін де үлкен жауапкершілік жүктеледі. Олар халыққа қызмет етудің үлгісін көрсетіп, әдеп нормаларын сақтауы тиіс. Қызметтік міндетті адал атқару, азаматтардың құқықтарын құрметтеу және ашық жұмыс жүргізу – сыбайлас жемқорлықтың алдын алудың тиімді тетіктері.

Сонымен қатар, цифрлық технологиялардың дамуы жемқорлық тәуекелдерін төмендетуге мүмкіндік беріп отыр. Электронды мемлекеттік қызметтердің көбеюі ашықтықты қамтамасыз етіп, адам факторын азайтады.

Сыбайлас жемқорлықпен күрес – тек мемлекеттік органдардың ғана емес, бүкіл қоғамның ортақ ісі. Әр адам адалдықты басты құндылық ретінде ұстанғанда ғана әділетті әрі дамыған қоғам қалыптасады.

Г.Айымбетова – басқарма басшысы