«Өнер алды – қызыл тіл» деп сөз қадірін биік қойған қазақ халқы үшін тіл – жай ғана қарым-қатынас құралы емес, ұлттың рухы, халықтың жаны, ғасырлардан жеткен асыл мұрасы. Тіл бар жерде – халық бар, тіл бар жерде – тарих бар. Ана тілі – әр адамның дүниеге келген сәтінен бастап бойына даритын ең қастерлі құндылығы, ұлтқа деген сүйіспеншіліктің бастауы.
Тіл – бабалардың аманаты. Сан ғасыр бойы ұрпақтан-ұрпаққа жалғасып келе жатқан салт-дәстүріміз, мәдениетіміз, әдебиетіміз бен рухани байлығымыздың бәрі ана тіліміз арқылы бүгінгі күнге жетті. Егер тіл жоғалса, халықтың өзі де тарих сахнасынан жоғалады. Сондықтан ана тілін сақтау – ұлттың болашағын сақтау деген сөз.
Қазақ тілі – терең тарихы мен бай қазынасы бар көркем тіл. Оның әр сөзі – мағынаға бай, әр тіркесі – даналыққа толы. Халқымыздың мақал-мәтелдері, шешендік сөздері, жыр-дастандары мен термелері ұлтымыздың өмірлік философиясын, дүниетанымын айқын көрсетеді. Қазыналы қарттардың өнегелі әңгімелері мен аналардың әлдиі де осы тілдің құдіретін танытады.
Ана тілінің құдіретін ұлы тұлғаларымыз да ерекше бағалаған. Қазақтың біртуар ақыны Ахмет Байтұрсынұлы: «Тілі жоғалған жұрттың өзі де жоғалады» деп бекер айтпаған. Бұл сөздің астарында үлкен мағына жатыр. Өйткені тіл – ұлттың мәңгілік ғұмырының кепілі.
Қазақ халқы тарихтың талай қиын кезеңдерін бастан өткерді. Бірақ қандай сын сағатта да өзінің тілі мен дәстүрінен ажыраған жоқ. Талай замандарда ұлттың рухын сақтап қалған да – осы ана тілі еді. Қиындыққа мойымаған халқымыз қара өлеңімен мұңын айтып, жырымен жігерін жанып, даналық сөздерімен ұрпағын тәрбиеледі.
Бүгінгі тәуелсіз елімізде қазақ тілі мемлекеттік тіл мәртебесіне ие болып, қоғам өмірінің барлық саласында кеңінен қолданылып келеді. Бұл – егемендіктің ең үлкен жетістіктерінің бірі. Дегенмен, тіл тағдыры тек заңмен немесе құжатпен шешілмейді. Оның болашағы әр азаматтың тілге деген құрметі мен жанашырлығына байланысты.
Ана тіліне деген сүйіспеншілік отбасынан басталады. Бесіктегі сәбидің құлағына анасының әлдиі сіңіп, алғашқы сөзі туған тілінде шығуы – үлкен бақыт. Әрбір ата-ана баласына ана тілін үйретіп, оның қадірін сезіндіре білуі керек. Өйткені туған тілінде ойлап, туған тілінде сөйлеген бала өз халқының мәдениетін, салт-дәстүрін терең түсінеді.
Қазіргі жаһандану дәуірінде көптеген тілдер түрлі ықпалға ұшырап жатыр. Ақпараттық технологияның дамуы, шет тілдерінің кең таралуы кейде ана тіліміздің қолданылу аясына да әсер етуде. Алайда өз тілін қадірлей білген халық ешқашан жоғалмайды. Керісінше, өзге тілдерді меңгеру арқылы дүниетанымын кеңейтіп, ана тілінің мәртебесін одан әрі асқақтата түседі.
Қазақ тілі – поэзияның, шешендіктің, ізгіліктің тілі. Бұл тілде Абай Құнанбайұлы мәңгілік мұра қалдырды, Мұхтар Әуезов әлемге әйгілі шығармаларын жазды. Бұл тілде талай ақындардың жүрек үні, талай аналардың ақ тілегі, талай батырлардың ұранды сөзі сақталған.
Тіл – ұлттың айнасы. Адамның мәдениеті мен тәрбиесі де оның сөзінен көрінеді. Әдемі сөйлеу, орынды сөз қолдану, ана тілінің тазалығын сақтау – әрбір азаматтың міндеті. Өйткені сөз қадірін білген халықтың рухы биік болады.
Бүгінгі жас ұрпақ – ертеңгі елдің тірегі. Сондықтан жастардың ана тіліне деген құрметін арттыру – қоғамның маңызды міндеттерінің бірі. Мектепте, отбасында, қоғамдық ортада қазақ тілінің мәртебесін көтеру арқылы біз болашаққа нық қадам жасаймыз. Тілге құрмет – елге құрмет, тарихқа тағзым, болашаққа деген сенім.
Туған тіл – адам жанының ең нәзік пернесі. Ол – ананың әлдиі, әкенің өнегесі, туған жердің самалы, ұлттың жүрек үні. Ана тіліміздің тұғыры биік, ғұмыры ұзақ болсын десек, әрқайсымыз оның жанашыры болуымыз керек.
Қазақ тілі – біздің кешегіміз, бүгініміз және ертеңіміз. Сондықтан туған тілімізді құрметтеу, оның мәртебесін көтеру, келер ұрпаққа аманаттау – баршамыздың қасиетті борышымыз.
Тіліміз жасасын! Ұлт рухының мәңгілік шамшырағы болған қазақ тілі әрдайым асқақтай берсін!

Ләззат ҚАЗМАҒАНБЕТОВА