Аудандық аурухананың ішін аралап жүріп, «перзентхана» бөліміне аялдадық. Бұл бөлім басқалардан ерекше екені даусыз. Себебі мұнда ана мен сәби бір-бірімен аман-есен қауышып, бүтін бір әулеттің қуанышы еселене түседі. Адамға өмір сыйлайтын құтты бөлімде шіліңгір шілденің ыстығы мен қақаған қыстың аязына қарамай қызмет ететін мамандардың қашан да еңбегі ерен екенін тағы да аңғардық.

Бөлім есігінен енген­­нен «ің­гәлаған» сәби­дің дауысын құ­­ла­ғы­мыз шалды. Әріптесім екеуі­міз, кезекші мейіргерге мұнда кел­ген­дегі мақсатымызды айтып, жаңа туған нәрестеге қарайтын неона­толог дәрігерді шақыруын сұрадық. Алайда дәрігер Сандуғаш Мал­дыбаеваны күтуге тура келді. Се­бебі ол жаңа ғана босанған ана­ның сәбиін толық тексерістен өткізіп жатыр екен. Білікті дәрігермен сұқ­баттасу үшін қанша уақыт болса да күтуге дайын тұрмын. Қолы қалт етіп босай қалса, қойың дәптеріммен қа­ламсабымды алып екеуара диалог құр­мақшымын. Арада біраз уақыт өткен соң бөлмесіне қарай бағыт ал­ған дәрігермен сұқбаттасудың реті түсті.
«Маған кішкентайымнан бала­лар­мен жұмыс жасаған қатты ұнай­тын. Туысқандарымның сәби­леріне қарап, немесе қуыршақты бөпе қылып ойнап өскендіктен бұл мамандық жаныма жақын болды. Сондықтан да жаңа туған нә­рес­­телердің дәрігері болдым. Бала күнгі арманым бүгінде сүйікті ма­мандығыма айналды» деп бас­тады әңгімесін дәрігер Санду­ғаш Имам­задақызы.
Дәрігер ең алғашқы еңбек жолын осы ауруханадағы инфекция бө­лімінде бөлім меңгерушісі қыз­метімен бастаған. Одан кейін пер­зентхана бөліміне ауысып, жаңа туған нәрестелерді толық тек­серістен өткізуді қолға алған. Ай­туын­ша, былтыр перзентхана бөлі­мінде 407 бала дүниеге келген. Ал ол оның 38-іне қажетті ем-шара жүр­гізген. Дәрігер сәбилер көбіне анасының құрсағынан туа пайда болған гипоксиялық ишемиялық зақымдану диагнозымен туыла­тынын айтты. Яғни бұл нәрестенің миына жеткілікті оттегі жетпейтін кезде, тұншығу салдарынан пайда болатын сырқат түрі.
– Бұл сырқат түрімен туылған балаларға дер кезінде көмек көр­сетіп, үйіне жағдайы жақсарған кезде шығарамыз. Кейде жағдайы аса ауыр, аппаратқа тәуелді бала­лар болады. Оларға өзімде 3 тәулік бойы көмек көрсетіп, жағдайы бірқалыпқа түспеген жағдайда об­лыстық «Ана мен бала» орталығына ауыстырамын, – дейді дәрігер.
Жыл басынан бері ауданда 53 бала дүниеге келіп, оның 5-еуіне толық ем-шара жүргізілген. Қазіргі таңда бөлімде 5 ана мен сәби бар. «Құтты қонақ келсе, қой егіз табады» демекші, бөлім біз келген күні бір сәбимен толықты. Жаңа туған нәрестенің жағдайын бізде өз көзімізбен көрмекші болып дә­рігермен бірге ана мен бала жат­қан палатаға қарай бағыт алдық. Барсақ, жас ана баласын бауы­рына басып, әнімен әлдилеп ұйық­татқалы жатыр екен.
– Аллаға шүкір, бұл менің 6-шы сәбиім. 2 қыз, 3 ұлым бар еді, енді 4 ұлды болдық. Ешқандай ша­ғымым жоқ. Дәрігерлер аман-есен босандырып алды. Баламның да, өзімнің де жағдайым жақсы. Ақ ха­латты абзал жандарға алғысым шексіз. Сандуғаш дәрігер мен 3-ші баламды босанғанда осы жерде жұмыс істейтін. Содан бергі ба­лаларымның барлығының ден­сау­лығына өзі қарап келеді, – дейді жас ана Әсем Шамитаева.
Айтпақшы кішкентай батырға Зейн деген есім беріліпті. Сұқбат со­ңында «батырдың бауы берік, үлкен азамат болсын» деген ақ ті­ле­гімізді жаудырып дәрігермен бір­ге бөлім тынысымен танысуға шық­тық.
Бөлімде Сандуғаштан бөлек 2 аку­шер-гинеколог, 5 акушер, 10 мейір­гер бар. Сондай-ақ 5 босану бөл­месі мен босанғаннан кейін жататын 10 төсек орын бар.
– 2017 жыл. Бөлімге 5 жыл бойы асығып күткен сәбиін босануға бір жас ана келді. Толғағы жеңіл болып, сәтті босанып, палатаға ауыс­тырылды. Алайда 1 күннен кейін баланың аузынан, тік іше­гінен қан кетіп, бала да қанның ұю жылдамдығы төмен болды. Ба­рынша қолымыздан келген көмекті көрсету арқылы қанды тоқтатып, баланы облыстық ауруханаға ауыс­тырдық. Бала сол жақта да то­лық ем алып, үйіне шықты. Қазір сол бала мектеп жасындағы оқушы. Анасын көшеден көргенде әлі күнге дейін ұмытпай баланың жағдайын сұрап тұрамын, – дейді кейіпкеріміз.
Бір қуантарлығы, соңғы жылда­ры мұнда ана мен бала өлімі тір­келмеген. Әрине, мұндай еселі еңбек – ұйымшыл ұжымның жемісті жұмысының нәтижесі.
Айта кетейік, дәрігер Сандуғаш қазіргі таңда перзентхана бөлімінен бөлек, қабылдау бөлімінде қо­сымша бөлім меңгерушісі қызметін атқарады. Мұнда науқастар күн­діз-түні түрлі сырқатпен келеді. Олар­дың басты міндеті – ауруы асқынғандарға шұғыл және жос­парлы түрде келген науқастарды ау­руханаға орналастыру.
– Ересектер қан қысымы кө­теріліп, жүрек ауруы сынды дертпен, артериялық гипертензиямен ша­ғым­данып келеді. Ал балалар кө­біне тұмаумен келеді. Кейде ал­ғашқы ем-шараны өткізгеннен кейін, науқастың жағдайы жақсарып жа­тады. Оларды толық­тай тек­се­рістен өткізіп үйіне қайта­рамыз. Қазірдің өзіңде жұмыс уақытының басталғанына көп болмаса да, 9 науқас түсіп үлгерді. Кейде күніге 40 науқасқа дейін қабылдап, бар­лығына қажетті көмек көрсетеміз, – дейді дәрігер.
Мәселен былтыр бөлімге 11 603 науқас келіп, оның 6382-сі ауруханаға жатқызылған. Ал 1622 науқас портал арқылы жоспарлы ем қабылдаған. Сондай-ақ 5221-і амбулаторлы ем қабылдап үйіне қайтарылса, 4769-ы шұғыл түскен. Олардың ішінде 1265 науқас жа­рақатпен түскен. Оның ішінде 77 науқас жол-көлік оқиғасына тап болса, оның 12-сі балалар. Ал алкогольді уланумен 113 науқас, күйік жарақатымен 45 науқас ем алған. Сондай-ақ 37 науқас инсульт диагнозымен тіркелсе, жедел ко­ронорлы синдром диагнозымен 161 науқас түскен. Мұнан бөлек, жедел ішек инфекциясы мен 179 науқас тіркелген. Ал жыл басынан бері мұнда 831 науқас келіп, 542-сі ауруханаға жатқызылған.
Бөлімде Сандуғаш дәрігермен қатар 1 аға мейіргер, 12 мейіргер тәулік бойы қызмет етеді. Мұнда 2 қарқынды емдеу палатасы бар. Біреуі – жүкті әйелдерге, екін­шісі – қосымша сырқаты бар нау­қастарға арналған. Бұл екі палата қажетті барлық құрал-жабдықпен қамтамасыз етілген. Бір тәулікте 15 науқасқа көмек көрсете алатын бөлімде 3 бақылау палатасы бар. Олар ерлер мен әйелдерге, ба­лаларға арналған. Мұнан бөлек, 5 төсек орны бар уақытша емдеу па­латасы бар. Бұл жақта науқастар өздерінің сырқаты бойынша қа­рай­тын дәрігерлер келгенше ем алып, кейін қажетті бөлімге ауысады.
Дәрігер Сандуғаштың айтуынша бұл бөлімге дәрігерлер түнгі уа­қытта кезекшілікпен тұрады. Ол былтыр бөлімге екі жас жігіт пышақ­тан жарақат алып түскенін айтты.
Иә, ақхалат киіп, «дәрігер» де­ген атты арқалағаннан кейін ал­дымызға науқас келгенде «бұл менің бөлімім емес, немес менің қолымнан келмейді» деп қарап тұрмаймыз. Жаңа туған нәрестелер дәрігері болсам да, ауыр жарақат алып келген екі жас жігітке хирург келемін дегенше алғашқы көмек көрсеттім. Бірінің – асқазанына, екіншісінің – бауырына зақым келген, – дейді дәрігер Сандуғаш Имамзадақызы.
Мамандыққа адалдық деген осы шығар, сірә! Себебі мұндағылар уақытпен санаспайды. Бұл бөлім жылдың 12 айында тәулік бойы дертіне шипа іздеген науқастарды қабылдап, сырқатынан сауықты­рады. Білікті маманмен құрған сұх­батымызды «дәрігер, шұғыл кө­мек қажет» деген мейірбикенің дабылы бұзды. Бізде дәрігердің жұмысына сәттілік тілеп, науқастардың аман-есен үйлеріне оралуына тілектестік білдіріп қайттық.

Ақтоты БҮРКІТБАЙ